Дзённiк экспедыцыi: 17 ліпеня 2021

Сёмы дзень экспедыцыі стаў музычнай кульмінацыяй усяго нашага падарожжа. Падрыхтоўка да вячэрняга анлайн-мерапрыемства пачалася зранку і ў нашым падароскім Зялёным дубе і ў сінагозе ў Орлі.

Веранда-перавёртыш рыхтуецца стаць танцполам і чакае гасцей

Беларуская каманда ізноў раздзялілася. Хтосьці адправіўся з Андрэям Бароўскім на пошукі музычнай спадчыны гэтых мясцінаў, хтосьці апрацоўваў сабраныя матэрыялы. І некалькі чалавек накіраваліся ў падароскі маёнтак і па ваколіцах, каб пазнаёміцца з аб’ектамі будучага турыстычнага кластара, які ствараюць нашыя партнёры. Відэаверсію стрыма з Юрасём Меляшкевічам са шпацыра па сядзібе Бохвіцаў шукайце ў раздзеле Падзеі і сустрэчы. І, увогуле, раздзелы медыя даведніка будуць папаўняцца новымі матэрыяламі з лакацый нашага маршрута.

Пан Дырэктар паказвае стары будынак, у якім будзе мясціцца гатэль

Працоўная група Штэтлфэст на танцпляцоўцы сядзібы Бохвіцаў. Маёнтак Падароск, аграгарадок Падароск — Наступны (арт?)аб’ект – танцпляцоўка, што засталася ў спадчыну з савецкіх часоў

Абмяркоўваем як можна выкарыстаць “архітэктурны аб’ект”

“Матэрыяльная спадчына” з маркерамі культурных слаёў. Буйным планам

Брама маёнтка. У фота нататках можна пабачыць цалкам адрэстаўраваную

Дзень рухаўся да завяршэння, і мы, нарэшце, заканэкціліся з нашымі польскімі сябрамі ў апошнім трансгранічным мерапрыемстве. Мы назвалі гэту сустрэчу “Штэтлфэст-potancowka. Па слядах старых мелодый памежжа”. Са свайго боку мы запрасілі эксперта і музыку-клезмера Аляксея Розава і капэлю Zhydovachka, з польскага боку была арганізаваная лекцыя Ewa Grochowska і танцавальная частка з удзелам капэлі Batareja.

Павел Ганчар. Праводзім танцавальна-музычны джэм з нашымі польскімі сябрамі. Аграсядзіба «Зялёны дуб», аграгарадок Падароск — Барадаты сантаклаўс – гэта не дзед мароз, а скрыпак клезмер Аляксей Розаў

У сваёй міні-лекцыі Аляксей Розаў расказаў і паказаў прыклады, як музыка мусіць працаваць з матэрыялам, каб яўрэйская танцавальная мелодыя атрымалася сапраўды яўрэйскай.

Ewa Grochowska пабудавала свой аповед на звестках аб вытоках музыкі штэтлаў. Мы даведаліся, як гучалі горад і вёска, на якіх інструментах гралі музыкі.

Лекцыя Ewa Grochowska ў сінагоге. Трансгранічны Зум: «Па слядах старых мелодый памежжа», горад Орля — Ewa Grochowska падчас лекцыі

Калі пачалася танцавальная частка, на нейкі момант падалося, што ўся наша працоўная група сабралася разам. Але гэта была ілюзія. І ўсё ж, нягледзячы на ўсе цяжкасці і абставіны мы здолелі сінхранізаваць на гэтыя восем дзён плённую, захапляльную і вельмі няпростую экспедыцыйную працу па абодва бакі мяжы. Таму танчылі і гралі ад усяго сэрца.

Ніжэй можна пагартаць атмасферныя фоткі з сінагогі ў Орлі, а фота-справаздача з нашай танц-веранды ў Падароску – у ізабелінскай калекцыі матэрыялаў.

Удзельнікі польскай часткі каманды Штэтлфэст і госці танчаць і спяваюць падчас і пасля Зума, горад Орля

Відэафрагменты з мерапрыемства ў Орлі можна паглядзець тут